معا للقضاء على الناصبين – وايصال القيمة من وراء اى كورس وليس مجرد شهادة

معا للقضاء على الناصبين – وايصال القيمة من وراء اى كورس وليس مجرد شهادة

كتير مننا بيسأل دلوقتى الزاى افرق بين الكورس اللى هينفعنى والكورس اللى هيضرنى او بمعنى اخر " كورس النصابين "

ببساطة فيه كتير من الدلالات والعلامات اللى من خلالها حضرتك او حضرتها تقدروا تفرقوا بين الكورس اللى هينفعك والكويس والكورس اللى هيضرك او بمعنى اخر كورس النصابين , دلوقتى هسرد ليكم بعضا من هذه العلامات اللى المراكز دى بتشتغل عليها علشان تقنع الناس بالكورس بتاعها رغم انه كورس ضعيف جدا فى المستوى وانت مش هتستفاد منه اى حاجه ولاكنك هتضيع فلوسك ووقتك على الفاضى فى حين انك كنت ممكن تستغل الوقت والفلوس دى فى دراسة نفس الكورس فى البيت او فى مكان محترم وبعدين نتكلم اقصد ايه بالمكان المحترم ده:

مراكز النصابين او المراكز الضعيفة دى بتشتغل على الأتى بإختصار:

-         الشهادات: اعلان الكورس هيتضمن انك من خلال الكورس بتاعهم هتحصل على كذا شهادة كمثال انك هتاخد شهادة من جامعة القاهرة وشهادة من جامعة كامبيردج ..الخ من الخرف ده وتقدر توثقها كمان من الخارجية والكلام اللى مش بيأكل عيش ده واللى ولا ليه اى لازمة نهائيا فى سوق العمل.

-         بيشتغلوا على فكرة ان كل المواد بــ 15 جنيه بمعنى ان يقولك منحة مش عارف ايه والمنحة دى بتشمل مستويين فى اللغة الانجليزية و 3 مستويات فى اللغة الفرنسية و مستويين كمان فى اللغة النوبية + 12 كورس فى التنمية البشرية ومنها ادارة الازمات والزاى تتعامل مع الناس ...الخ , خدها قاعدة كل ما الكورس تفرع وتشعب كتير كل ماكان بيدل على ان مستوى الكورس ده ضعيف جدا بمعنى ان التخصص كويس وانت رايح تاخد كورس فى مكان كويس خصوصا ان المراكز دى الاستاف بتاعها مش بيكون على المستوى والكفأة المطلوبة.

-         هيقولك المدرب بتاعه مدرب معترف بيه ومعتمد من امريكا ومش عارف منين ومنين والهبل ده وانه حاصل على دكتوراه من جامعة غزل المحلة فى الغربية =D  وانه مدرب فى المركز الكندى وكان ابن عم دكتور ابراهيم الفقى والكلام ده كله خرف فى خرف ولا ليه اى قيمة كما تحدثنا من قبل.

-         الاسماء: بيعتمد انه يجيب رجلك من خلال اسمه ودى هتخد بالك منها كتير امثلة للاسماء دى يقولك: معهد واشنطن الدولى قال بالتعاون مع مؤسسة التدريب والعلوم العصرية ده من ضمن بتوع بير السلم , مركز كامبيردج للعلوم والتكنولوجيا  - مركز صفت اللبن لتنمية مهارة الشباب ...الخ.

-         التحريف:  المراكز دى دايما بتطلق على كورساتها لفظ معين تقدر تعلم عليها من خلاله وهو يقولك " منحة مدعمة وبتخفيضات 70 % " أولا: المفروض لفظ منحة ده بيطلق على الكورسات المجانية فقط لا غير واللى مش بيندفع فيها ولا مليم غير كده كله نصب وهكلمكوا عن بعض المنح فى مصر ان شاء الله دلوقتى.

-         تكملة للنقطة اللى فوق فيه مراكز برضه بتحاول تغير من طريقتها انه يقولك هتدفع تأمين وهتسترده بعد انتهاء المنحة عادة لو مش مكان معروف بيكونوا نصابين يعنى فكك منهم خالص.

-         طالما المركز متخصص فى مليون حاجه خصوصا لو مركز مش مشهور يبقى نصابين ومش هتستفاد حاجه منه نهائيا.

-         الورق اللى بيتم توزيعه داخل وخارج الجامعة لمنح وكورسات بفلوس كلها نصب فى نصب.

-         التنمية البشرية اللى بيتم الاعلان عنها كل يوم فى ورق يتوزع عليك فى الجامعة والحاجات دى مبقتش تأكل عيش والله ولا ليها لازمة نهائيا عاوز تتعلم تنمية بشرية صح انزل اتطوع فى اى مكان زى رسالة او صناع الحياة ...الخ هيفيدوك اكتر بكتير من لو اخدت مليون كورس من دول لانه ليس له قيمة وبأكد على كده.

-         نيجى بقى للشهادات عقدة الشعب المصرى: ببساطة تيجى تقول لواحد انا رايح اخد كورس فى المكان الفلانى , اول سؤال بيسألهولك هناخد شهادة دون ان يسأل هل هستفاد او هل المركز كويس ..الخ , ببساطة ايضا والله الشهاداة دى ولا ليها اى لازمة طالما انت مش استفدت حاجه من الكورس ده من الاخر لو شايف نفسك مش استفدت من الكورس قطع الشهادة بتاعته وريح نفسك احسن , ناخد مثال نوضح بيه ليه الشهادات مش مهمة : كمثال لو رايح اعمل انترفيو وانا واخد شهادة من الجامعة الامريكية تثبت انى بعرف انجليزى زى الفل وجيت بتكلم فى الانترفيو مش عارف انطق الحروف اساسا هل الشهادة تثبت انى بعرف اتكلم ولا كلامى هو الدليل , مثال تانى: الكمبيوتر شهادة زى الـ ICDL  دليل انى بعرف على الكمبيوتر ولا لما اقعد اشتغل فعليا على جهاز.

-         نصيحة: ماتستعجلش فى موضوع انك تاخد كورسات بمعنى مش اى كورس يقابلك تاخده او تجرى وراه بمعنى اخر فيه اساسيات لازم تشتغل عليها ان شاء الله وهى كالأتى وبالترتيب ولازم تشتغل عليها ان شاء الله: الانجليزى الاول لازم يتظبط وبعدين السوفت اسكيلز ثانيا وبعدين التخصص بتاعك ثالثا ان شاء الله.

-         اخيرا: والله ممكن تاخد كل الكورسات اللى انت عاوزها وبمستويات عالية جدا ببلاش من غير ولا مليم بس انت تفرق وتعرف تجيب الحاجات دى ان شاء الله من خلال متابعة الجروب بتاعنا Productive Youth Group وتستفسر عن كل حاجه نفسك فيها والتيم كله هيفيدك ان شاء الله.

لو عاوز تاخد كورسات كويسة ذات قيمة علمية كويسة تستفاد منها حقيقية:

-         الجامعة الامريكية بالقاهرة.

-         المركز الثقافى البريطانى.

-         مؤسسة التعليم من اجل التوظيف ( منح مجانية تماما ).

-         منحة الاديو ايجيبت ( مجانية تماما تبع وزارة الاتصالات ).

-         مركز نوليدج Knowledge بيقدم منح مجانية تماما وده بالتنسيق مع وزارة الاتصالات.

-         منحة الـ 9 شهور ITI  تبع وزارة الاتصالات ايضا ( مجانية تماما ).

-         المعهد المصرفى المصرى.

-         فريق معا ( محاضرات اسبوعية مجانية ).

-         انشطة طلابية فى جامعة القاهرة وعين شمس والجامعة الامريكية ( بتقدم كورسات ومحاضرات مجانية ).

-         انشطة طلابية فى جامعة الزقازيق ( هتلاقينا فى MYG وطلبة كلية هندسة وانشطتهم ).

-         ممكن تتعلم كل حاجه من على النت ( عندك الكنز وهو اليوتيوب او مواقع كتيرة للتعلم الذاتى من خلال الانترنت ).

-         وفيه اماكن كتيرة جدا تابعوا الجروب وان شاء الله كل المنح اللى ببلاش وتحتها مليون خط واللى مستواها عالى جدا وتحتها مليون خط برضه هتلاقونا بنزلها دايما ان شاء الله.

اللهم قد بلغت اللهم فأشهد

سبحانك الله وبحمدك .. سبحانك الله العظيم

تحياتى: محمد صبرى السلامونى