خلصنا ومش عارفين هنعمل ايه .. ده حال ناس كتير مننا

" خلصنا ومش عارفين هنعمل ايه .. ده حال ناس كتير مننا "

ناس كتير طلبت منى وسألتنى عن ايه اللى المفروض يعملوه بعد مااتخرجنا وبحكم خبرتى الضئيلة جدا ورأى الشخصى بعرض فكرتى ايه بالنسبة لحياة مابعد التخرج واتمنى انها تفيدكوا وياريت تدعولى وتفتكرونى بالخير ان شاء الله.

أولا:

الانجليزى ثم الانجليزى ثم الانجليزى

بالنسبة للانجليزى ده فى رأى اهم حاجه لازم الواحد يركز عليها بعد مايتخرج ويأهل ويشتغل على نفسه كتير فيها بجد لانه بمثابة مفتاح سحرى بالنسبالك للتقدم لاى وظيفة اى كانت فى بنك فى شركة كبيرة او اى مكان محترم دلوقتى فى البلد شرطه الاساسى هو انك تكون بيرفيكت فى الانجليزى.

طيب اطور نفسى الزاى فى الانجليزى :

-         أول طريقة: ممكن تدرسه لوحدك وتطور من نفسك فى البيت من خلال بعض الماتريال اللى ممكن تنزلها من على النت لبعض الكورسات المشهورة والمنتشرة على النت وفيه قنوان كتيرة على اليوتيوب او مواقع لدراسة اللغة اون لاين تساعدك فى تطوير نفسك بشكل كبير.

-         ثانى طريقة: وهى موضوع الكورسات وفيه كتير من الأماكن الكويسة فى القاهرة اللى سمعتها عالية جدا وجودتها عالية بالمثل.

طيب ايه الأماكن اللى ممكن اخد فيه كورس انجليزى؟

سهلة ياسيدى عندك كتير من الأماكن الكويسة فى القاهرة زى ماذكرت قبل كده :

الجامعة الامريكية فى القاهرة (AUC)

http://www.facebook.com/pages/AUC-School-of-Continuing-Education-SCE/111044768963212?id=111044768963212&sk=info

المركز الثقافى البريطانى (British council)

http://www.facebook.com/BritishCouncilEgypt/info

الامديست (Amideast)

http://www.facebook.com/amideast/info

بيلتز وده موجود فى بعض الجامعات زى جامعة القاهرة وعين شمس  (Berlitz)

http://www.facebook.com/BerlitzEgypt/info

مش كورسات ( Not Courses )

http://www.facebook.com/Notcourses/info

سبرايد يور انجلش  ( Spread your English )

http://www.facebook.com/syeteam/info

اسعار كورسات اللغة فى الجامعة الامريكية والمركز الثقافى البريطانى والامديست بتتراوح من 700 – 1200 للمستوى الواحد تقريبا.

اسعار كورسات اللغة فى الباقى بيتراوح من 350 – 500 جنيه للمستوى الواحد تقريبا.

ثانيا:

المهارات الأساسية او اللى بيطلق عليها Soft Skills

دى مهمة جدا جدا جدا بجانب الانجليزى

يعنى ايه Soft skills الأول وليه مهمة ؟

دى المهارات الاساسية اللى لازم تكون متوفرة فيك ودى حاجات الواحد بيكتسبها عادة بالممارسة والتعلم المستمر زى :

Presentation Skills, Negotiation Skills, Creative thinking skills,

CV writing and interview skills...Etc

طبعا الكلام ده كله ممكن ناخده فى أماكن محترمة جدا وفيه منح كتيرة فى الحاجات دى وببلاش !!!!

طيب اخد الحاجات دى فين ؟

-         طبعا المكان الاول بلا منازع واللى ليه الفضل الاول بعد ربنا عليا وهو " فريق معا " ايوه فريق معا كل الحاجات دى هتتعلمها هناك ببلاش ومحاضراتنا كل يوم جمعة وعبارة عن دفعات متكررة  يعنى لو فاتك محاضرة فى دفعة هتتعاد فى الدفعة اللى بعديها ودى هتبدأ قريبا جدا ان شاء الله واول ماتبدأ هعرفكوا ان شاء الله.http://www.maaan.net/

-         ثانيا: منحة هى منحة الاديو ايجيبت ودى بتدرس فيها المهارات الاساسية دى.

-         ثالثا: منحة هى منحة مؤسسة التعليم من اجل التوظيف ودى بتدرس فيها المهارات الاساسية دى وبيدرسلك فيها ناس من امريكا ومن الجامعة الامريكية. http://www.facebook.com/EFEEgypt/info?ref=br_tf

-       رابعا: مكان اسمه " زدنى " وده فى رابعة العدوية فى القاهرة ويعتبر من احسن الاماكن اللى فى مصر اللى بتدرس المهارات الاساسية دى وفيها ناس على اعلى مستوى. http://www.facebook.com/Zedny/info

ثالثا:

نيجى بقى لكورسات التخصص وكلامى هيكون على محاسبة نوعا ما تحيزا لتخصصى J

-         اولا: لازم واساسى تكون مظبط نفسك كويس جدا فى برامج الاوفيس اهم حاجه ومطلوب جدا وانت رايح تشتغل هتتسأل اول سؤال بتعرف تشتغل على الاكسيل يابنى هتقوله اه ده انا واخد ال ICDL ملهاش لازمة ياحبيبى هيقولك طيب ياحبيبى افتح الجهاز وورينى بتعرف ايه عليه !!

-         ثانيا: بالنسبة لبرامج المحاسبة زى البيتش ترى والكلام ده الحاجات دى بقت موضة قديمة وملهاش لازمة بصورة كبيرة لانك لو رايح اى شركة او بنك بيبقى فيه برنامج معين هما شغالين عليه وكده كده هيدربوك عليه فمتشغلش بالك بالموضوع ده دلوقتى ركز فى الاهم اللى فوق.

-         ثالثا: اللى حابب بقى ياخد حاجه عليها القيمة بالنسبة لبرامج المحاسبة عندك برنامجيين: اوراكل وساب ودولت الاتنين الكورس الواحد يدخله فى 5 الاف جنيه فيما فوق وكورسات جامدا جدا جدا جدا جدا لاقصى درجة وهتميزك كتير عن اى حد متقدم معاك فى نفس الوظيفة والبرامج دى طبعا مش اى اماكن بتستخدمها يعنى الاماكن اللى بيستخدموها فى مصر قليلين وهما شركات المالتى ناشيونال والبنوك وهكذا ومرتبك طبعا بيكون معدى يعنى 7 الاف وانت طالع بقى.http://education.oracle.com/pls/web_prod-plq-dad/db_pages.getpage?page_id=317

-         رابعا: بالنسبة لكورس ال CMA  للاسف ناس كتير جدا فاكرينه بالسهولة انهم يدفعوا فلوس فى الجامعة الامريكية او اى مكان وياخدوه وده غلط طبعا الكورس ده من الشهادات الدولية التقيلة اللى محتاجه سنة كاملة متفرغ فيها علشان تدرسه كاملا ومش بالسهولة اللى كل الناس متوقعاها ونصيحة الكورس ده مش لازم دلوقتى تفكر فيه الا لما تشتغل وتاخد خبرة من شغلك وتعرف مجال المحاسبة فى مصر شغال الزاى وبعدين تاخده خصوصا هيكون معاك الفلوس اللى هتسهل عليك + خبرتك والكورس بيتاخد فى الجامعة الامريكية والجزء بيعمله حوالى 6 الاف جنيه مصرى يعنى الكورس كامل ممكن يعمل 15 الف جنيه تقريبا.https://www.facebook.com/groups/62506503768/?ref=ts&fref=ts

-         خامسا: فيه دبلومة محاسبة كويسة جدا فيه موضوع خاص بيها ممكن تطلعوا عليه هو كويس جدا ( من اعداد زميلى وصديقى : وليد هشام ).

طيب لو حبينا ناخد كورسات متعلقة بالمحاسبة ؟

-         عندكوا فيه الجامعة الامريكية بالقاهرة.

-         وفيه المعهد المصرفى المصرى وهو كورساته تبدأ من 700 وانت طالع خلاف انه فيه منح ببلاش كتير جدا.http://www.facebook.com/EgyptianBankingInstitute/info

اخيرا:

دى بعض النصائح العامة ياريتكوا تخلوها حلقة فى ودانكوا وربنا يكرمنا جميعا

بعنوان تعرف النصاب منين

-         أولا اى حد يقولك منحة وهتاخد فيها مش عارف 4 شهادات معتمدة من جامعة ايه فى امريكا وشهادات ايه موثقة من الخارجية وهتاخد مستويين انجليزى وواحد ايطالى وواحد فرنساوى وعليهم 12 كورس تنمية بشرية كل ده نصب فى نصب ولا تبص عليه نهائى.

-         ثانيا طالما الموضوع فيه لفظ منحة اعرف ان الكورس ده مدعم لاقصى درجة او عادة بيكون مجانى مش بفلوس زى ماالنصابين بيروجوا ليه.

-         ثالثا الناس متستعجلش فى موضووع الكورسات انا عارف ان كل الناس ساخنه عاوزه تاخد كورسات وتدفع فلوس فى اى حاجه تقابلها اهدوا واعرفوا المكان اللى انتوا رايحينه صدقونى كل مكان وكل اسم ذكرته فى المقال ده نتيجة خبرة حوالى 3 سنين لف ومرمطة فى القاهرة وتعب كبير جدا الواحد تعبه علشان يوصل للمرحلة دى الحمد لله.

-         رابعا امانة عليكوا ياشباب اهتموا انكوا تستفادوا من اى كورس وسيبوكوا من موضوع الشهادة ده خالص يعنى متفكرش هتاخد شهادة ولا لا فكر هاخد علم وهستفاد بيه ولا لا وخلى ده حكمك على اى مكان تاخد فيه كورس.

-         ونصيحة ليكوا خدوا موضوع الكورسات واحدة واحدة واجتهد واسعى بكل ماأوتى من قوة علشان تستفاد وتفيد غيرك.

-         تابعوا المدونة والجروب بشكل مستمر علشان الفرص والكورسات اللى بنزلها بشكل دورى ومستمر ان شاء الله.

-         كل مكان انا متكلم فيه فى المضووع ده حاطط الرابط بتاعه جانبه والرابط ده عبارة عن الناس دى بتقدم ايه وعناوينهم ايه تمام J.
-  التطوع مهم جدا وبيقيس مدي اندماج الشخص في حياة المجمع المدني لان دي انا شوفته بنفسي فى كتير من الانترفيوهات والتقديم للمنح وخلافه.

- نصيحة ياشباب ادخل انترفيو واتنين وتلاتة عادى ممكن ماتتقبلش او تنجح فيه ولاكن خبرة الانترفيو ورهبته بتديك خبرة كبيرة جدا وبتساعدك انك تروح مكان افضل كتير من اللى كنت بتعمل فيه انترفيو ودايما روح الانترفيو وماتخفش لان كله بيثقل فى المهارات بتاعتك وبيساعدك قدام.

                                                             جزاكم الله خيرا

                                                              اخوكم فى الله

                                                             محمد صبرى السلامونى