اتيكيت البيزنس: 5 نصايح تهمك

أدب، أخلاق، اتيكيت، كلمات مملة صح؟ وممكن كمان تقول انها مخادعة واحنا دايما بنحس ان العادات الاجتماعية والاخلاقية الى لازم نلتزم بيها بتتدخل فى حريتنا كأفراد. لكن فكرة الاتيكت والاخلاق فى التعامل لسه برضه مهمة جدا خاصة فى البيزنس.والمشكلة ان برامج التواصل الاجتماعى زى الفيسبوك ولينكد ان، خلطت المناسب والى مش مناسب على بعض وخلتنا مش عارفين نتصرف فى مواقف اجتماعية مجهولة بالنسبة لينا

فكرة الاتيكيت فى الاساس وباختصار هى انك تخلى الناس تحس انها مبسوطة، الفكرة مش قواعد او انك تقول للناس تعمل ايه او متعملش ايه، فكرة الاتيكيت هى ان الناس تحس مبدئيا بالراحة فى التعامل معاك

طيب تعالى نشوف شويه قواعد اتيكيت مهمة جدا فى البيزنس:

ابعت رسالة شكر : الفكرة دى طبعا اصبحت نادرة بس المفروض ده اللي يحصل. لو عندك مقابلة شغل او زيارة عملاء او مقابلة شركاء جداد للشركة بتاعتك، و خصوصا لو كنت فعلا عايز الوظيفة او الصفقة او العميل ده، خد خمس دقايق اكتب فيهم رسالة شكر للناس عملولك المقابلة او الشركة الى زرتها. الرسالة دى هتميزك عن باقى الناس وهتعكس بطريقة كويسة جدا على شركتك

اعرف اسامى الناس : زى ما بتهتم انك تحسن علاقاتك مع العملاء او المديرين، اهتم برضه انك تعرف زمايلك فى الشغل او الناس اللى بتشتغل عندك. تواصل مع الناس الى فى شركتك مهما كانت شغلتهم فى المكان وقدر الى بيعملوه. طبعا انت بتبذل مجهود كبير وبتقضى وقت اكبر فى انك تبهر مديرك وتلفت انتباهه بس لما تبدأ تهتم وتقدر كل الناس الى بتشتغل بجد عشان شركتك تنجح هتلاقى الموضوع يستحق فعلا

خلى بالك من" قانون الاسانسير" : فكرة قانون الاسانسير هى انك بعد خروجك من اجتماع بره شركتك مع عملاء او ناس ممكن تتشاركوا مع بعض فى بيزنس معين، وانت فى الاسانسير متتكلمش عن الاجتماع مع زمايلك او تتكلم عن انطباعك عن الناس لغاية لما الاسانسير يوقف وتخرج بره المكان خالص. الفكرة ممكن تكون جاية من ناحية انك تكون مهذب ومتتكلمش وحش عن الناس او من ناحية انك مش عايز الشغل الى انت داخل عليه يتنحس من اولها، بس بصفة عامة ما تخاطرش بانك تبوظ سمعتك بأنك أول ما تخرج من الاجتماع تفضل تعيد وتزيد فى الى حصل فيه

ركز فى وشوش الناس مش شاشة اللاب توب او التليفون : صعب جدا ان انتباهك ما يتشتتش الايام دى عشان طبعا مش ملاحق ايميلات وتليفونات طول اليوم و وشك مدفون فى البلاك برى علطول وتلاقى نفسك فاكر انك لما تعمل تلاتين حاجة فى نفس الوقت ده هيبين قد ايه انت واد منجز وكفاءة. بس ده مش صحيح، الى هيخليك فعلا كفاءة هو انك لما تكون مثلا فى اجتماع او بتتكلم مع حد فى الشغل، تقفل تليفونك وتركز مع الناس وتبقى منتبه ومصحصح للى بيتقال وهو ده طريق النجاح والتميز

ما تحكمش على الناس : أهم نصيحة اتيكيت لحياتنا دلوقتى هى انك ما تنتقدش حد او تحكم على حد لأن كل واحد فينا عنده عيوب وبرضه كل واحد عنده فرصه انه يتغير. انت ممكن تعترض على طريقة تعامل حد فى موقف محدد بس عديها وتفهم ان كل واحد بيحاول يعمل الى يقدر عليه والفكرة ان انت مش شغلك تحكم على الناس بناء على وجهة نظرك انت أو الى حاسس انه المفروض يكون صح ، انت بس مسئوول عن نفسك وقرراتك مش عن أى حد تانى

واخيرا لازم تعرف ان كل واحد فينا عايز يتميز ويكون محبوب ومقبول اجتماعيا ومهنيا بين زمايله بس للاسف عالم التكنولوجيا الى احنا عايشين فيه دلوقتى خلانا مش عارفين أذا كنا بنتعامل مع الناس صح ولا بنتعدى حدودنا، بس الموضوع بسيط، فكرة اتيكيت التعامل فكرة بتاثر على حياتك بطريقة ايجابية مش بس مجموعة قواعد تعملها أو متعملهاش

يبقى دايما اسأل نفسك وانت بتعمل هاش تاج على تويتر أو بتعلق على صفحة حد على الفيسبوك أو بتبعت لحد رسالة : هل الكلام الى انا كتبه ده هيخلى الشخص ده مبسوط ولا هيضايقه؟ و دى هى فكرة الاتيكيت و افتكر كمان أنك لما تكتب لحد رسالة على ورقة وتبعتهاله هتدى انطباع احسن من تويتر وفيسبوك والانطباع ده عمره ما بيروح