طبعا ضغط الشغل بشع ، بيأثر على نفسيتك ويتعبها وممكن يخليك تهب فى اى حد معدى قدامك وقال كلمة ملهاش لازمة بس انت كنت ممكن تعديها فى اى وقت تانى و تفضل طول ايام الشغل كأنك فى نار.
لا لا كفاية كده ،اظن لازم يكون فىه حل.
هنقدملك بعض الخطوات الى لو حاولت تطبقها من بكره والايام الى جايه هتساعدك كتير انك تتخلص من ضغط الشغل الى انت شايله على كتفك لأنك لو مش مصدق انه ممكن يخرب حياتك، تبقى غلطان جدا.
- بطل القهوة : عارف هتقول ايه، ازاى؟ دى القهوة فى دمى، ودى بالظبط هى المشكلة. مادة الكافيين الى فى القهوة عامله بالظبط كأنها مادة توتر سايلة، فى نفس الوقت الى بتزود انتاج ماده الادرنالين فى الدم كمان بتقلل افراز مادة الادينوساين وهى مهدئ طبيعى بيفرزه المخ. دكتور دافيد بوزن وهو خبير فى التوتر ومؤلف كتاب" ازاى تغير لعبة خسرانة لمكسب" بيقول"على حسب علمى يعد الاقلاع عن الكافين من طرق تقلبل التوتر الاكثر فعاليا." ده كمان دكتور بوزن بيقول ان 75% من المرضى بتوعه الى بيشربوا قهوة منزوعة الكافين بيحسوا فعلا انهم هادين اكتر ومش هتصدق كمان بيحسوا ان حيويتهم ونشاطهم زادوا و ده بسبب انهم بقوا بيناموا احسن. وعشان تتجنب الصداع الى هيجيلك لما تبطل الكافين، دكتور بوزن بيقترح انك تقلل بالتدريج، يعنى قلل فنجان قهوة كل مرة والافضل تبتدى بآخر فنجان بتشربه فى اليوم.
- كلمة السر هى النظام : لو سألت دافيد الن وهو مؤلف كتاب" انجاز الاشياء: فن النجاح فى عمل شئ بدون توتر" ايه اكتر حاجة تقضى على ضغط الشغل؟ هيقولك علطول: النظام ، فى رأيه " النظام هو اكتر حاجة محتاجنها واكتر حاجة ناقصة." حتى ابسط عادة هتعملها عشان تنظم وقتك ممكن بالتراكم توفرلك ساعات كتير من وقت شغلك وطبعا لما توفر وقت ويكون عندك وقت زيادة ده بيقلل ضغط الشغل. بالنسبة للخبير دافيد الن اكتر حاجة فعلا بتنظم له وقته هى " مراجعة آخر الاسبوع" يعنى بيراجع اميلات الاسبوع وايه الى انجزه خلال الاسبوع، بالنسبه له ده " احسن وقت بيقضيه" لأنه بسبب العاده دى مش بيحس ابدا انه مجهد او مرتبك فى بداية الاسبوع الجديد.
- راقب نفسك : لو فجأة انتبهت ولقيت ضهرك محنى على لوحة مفاتيح الكمبيوتر الى قدامك وكتفك بيوجعك جدا وانت بقالك كده فترة و مش حاسس بنفسك يبقى فى مشكلة ولازم تراقب نفسك زى ما الباحثين فى جامعة فرجينيا الغربية اكتشفوا ان مستويات التوتر قلت عند 54% من الناس بعد ما بدأوا برنامج تنبيه العقل لمده شهريبن، والبرنامج ده ببساطة معناه انك تنتبه اكتر لاعراض التوتر، زى الم شديد فى العضلات و التفكير المرتبك.طبعا هتقول ولسه هستنى شهرين؟ الخبر الحلو زى ما دكتور كيمبرلى ويليمز الى عملت الدراسة دى بتقول هو انك مش محتاج تكمل الشهرين كلهم، اى تعديلات صغيرة ممكن تؤدى لفوايد اكبر . يعنى خلى بالك من حاجات زى مش قادر تفكر كويس او عندك صعوبة فى التنفس او الم فى الكتف، دى كلها علامات انك مضغوط فى الشغل.
- اعمل تمارين بسيطة : استشارى العلاج الطبيعى نيل تشاسان بيقول اننا لما بنكون متوترين بنمد جسمنا للامام عشان نركز فى الى بنعمله وده بيخلى عضلات الرقبة واسفل الظهر يبذلوا مجهود اكتر و هم اساسا عضلات صغيرة. طيب انت قاعد لازق على مكتبك مش قادر تتحرك عشان عندك شغل ، تعمل ايه؟ تشاسان عنده تمرين بسيط ممكن تعمله بسرعة وانت قاعد على مكتبك و هو:اشبك ايديك الاتنين ورا رقبتك وضم كتافك على بعض وبعدين خلى راسك تنزل لتحت شويه بحيث دقنك يكون قريب لصدرك وفى نفس الوقت خلى كوعك اليمين والشمال قدامك مع بعض وبعدين انزل براسك شويه لتحت، خليك كده ثوانى وبعدين فك ايدك. كرر التمرين ده من 6 ل 8 مرات كل ما تحس بالم فى كتفك.
- خد فيتامينات : فى دراسة فى جامعة برمنجهام البريطانية شملت رجال من سن 18 ل 42 سنة، وجد الباحثين ان الرجال الى اخدوا يوميا فيتامينات مركبة من فيتامين سى و بى، قل معدل التوتر والقلق عندهم بنسبة 21% وكمان قالوا انهم حاسين بتعب اقل وتركيزهم اصبح اعلى. و زى ما البحث وضح ، السبب فى كده فيتامينات سى و بى بتساعد على تقليل اضرار التوتر.
- واخيرا حاول تاخد 5 دقايق على الاقل من وقتك واعمل حاجة تضحكك.
http://www.menshealth.com/mhlists/beat_work_stress/index.php
No comments:
Post a Comment