عندك مقابلة شغل؟
بص يا عزيزى ، لما تقابل حد ممكن يكون مديرك فى المستقبل هتلاقى انك بتتقيم من قبل ما تفتح بقك. فشوف الخطوات دى عشان تساعدك تنجز المقابلة و تقدر تستخدم الوقت المتاح ليك بحكمة.
- فى بداية المقابلة وقبل اى كلام هتلاقى الشخص الى بيعملك المقابلة بيقيمك مع نفسه كشخص جديد لسه بيشوفه لاول مرة وبيدور على أدلة عشان تدعم انطباعه عنك زى ما بيقول دكتور جيت ليندجارد من جامعة كارلتون فى اوتاوا.
وطبقا لدراسة فى مجلة الشخصية وعلم النفس الاجتماعى، الناس بندى اهتمام للراجل الى بيبين انه مسيطر ، يعنى خلى مظهرك يبين انك شخص بارز ومتميز بس مش بدرجة زيادة عن اللزوم يعنى مثلا :زراير اكمام القميص ، دبوس الكرافات، منديل جاكت البدلة او كرافات غير تقليدية. مظهرك الانيق هيضمن لك موافقة مبدئية. - الانطباع التانى عنك هيبان من سلامك على الشخص الى هيعمل المقابلة معاك. فطبقا لاستطلاع رأى عملته الجمعية الوطنية للكليات واصحاب العمل سنة 2006، وجدوا ان لو قبضة ايدك ضعيفة فى سلامك على حد ممكن يكون صاحب المكان الى هتشتغل فيه هتدى انطباع اسوء من لو كنت عامل تاتو او قصة شعر غريبة اما القوة فى سلام الايد بتدى انطباع بالحيوية والنشاط زى ما بيقول الباحثين فى جامعة نيويورك فى نتائج ابحاثهم الى بتدعم الاعتقاد بأن قوة قبضة اليد قد ترتبط وراثيا مع اللياقة البدنية.اذن وانت بتسلم على الراجل فى المقابلة خلى معصم الايد والذراع فى وضع افقى قدامك عشان سلامك يكون فى اكبر قدر من القوة الملائمة طبعا، اما لو معصمك كان معوج شوية فده هيقلل من قوة قبضة الايد.
- ما تقلقش لو حسيت انك متكلمتش كتير. فى دراسة مهمة بتقول ان الناس الى فعلا اتقبلوا فى الوظيفة اتكلموا دقيقتين اقل من الشخص الى عمل معاهم المقابلة.ممكن تسأل سؤال محفز يعنى مثلا تسأل عن اخر مشكلة واجهت الفريق الى هتشتغل معاه فالشخص الى قدامك هيبدأ يتكلم معاك عن الشغل وانت تكون عندك فرصة تعرفه مهاراتك فى حل المشاكل.
- الباحثين فى جامعة كاليفورنيا بيقولوا ان المحاور النموذجى يقدر يقيم صدقك بدقة كبيرة فى 10 دقايق من وقت المقابلة. ومع ذلك حوالى 75 % من المتقدمين لوظائف بيكدبوا وذلك طبقا لدراسة فى مجلة علم النفس التطبيقى فى سنة 2007 . اذن الافضل لك انك تقول الحقيقة وتقاوم فكرة انك تتصرف بطريقة تخلى شكلك حلو قدام الناس زى ما الدراسة بتحذر، يعنى بلاش فكرة انى لا اكذب ولكنى اتجمل دى لأن فرص النجاح بتقل بنسبة التلتين لما المتقدم لوظيفة بيحذف تفاصيل معينة او يتكلم كأنه عمره ما فشل فى حياته او يخفى حاجة محرجة. لأن المشكلة ان كل الحاجات الى خبيتها او حذفتها من كلامك لو ظهرت بعد حصولك على الوظيفة هيكون الضرر عليك مضاعف.
- الناس المسئولة عن المقابلات ممكن جدا ميفتكروش اجابات الاسئلة بالنص بس اكيد هيفتكروا طريقة الاجابة، يعنى خليك محدد.كارول مارتن مؤلفة كتاب" ارفع معدل ذكاء مقابلاتك" بتقول ان المحاور فى المقابلة بيدور على امثلة توضح ازاى انت هتشتغل فى المستقبل. يعنى المطلوب منك انك تيجى المقابلة وانت محضر حكايات وامثلة ممكن تدخلها فى اى رد على سؤال عشان تبين قدراتك القيادية و مهاراتك فى التواصل وصدقك.
http://www.menshealth.com/mhlists/job_interview_strategies/
